Categories
სოციალური მედია ციფრული მარკეტინგი

რა არის SEO და როგორ გამოვიყენოთ ის ჩვენი ბიზნესის წარმატებისთვის?

SEO

Რა არის SEO და როგორ გამოვიყენოთ ის ჩვენი ბიზნესის წარმატებისთვის?

თანამედროვე სამყაროში ბიზნესის არსებობა ვებგვერდის გარეშე თითქმის წარმოუდგენელი ხდება. თუკი ციფრულ სამყაროში სათანადოდ არ ხარ წარმოჩენილი, შენი მომავალი განწირულია. ეს ეხება როგორც მსხვილ ბიზნესკორპორაციებს, ისე მცირე მეწარმეებს. 

ყოველდღიურად მილიონობით ადამიანი მიმართავს საძიებო სისტემებს მისთვის საინტერესო ინფორმაციის მოსაპოვებლად. მნიშვნელოვანია, რომ შენი ბიზნესისა და პროდუქციის შესახებ ინფორმაცია ამ ადამიანებისთვის არამხოლოდ ხელმისაწვდომი იყოს, არამედ საძიებო სისტემაში ძიებისას პირველივე გვერდზე გამოჩნდეს. სხვა შემთხვევაში, შენი პროდუქცია ინტერნეტში ,,დაიკარგება” და პოტენციურ მყიდველამდე ვერ მიაღწევს. 

 

სწორედ ამისათვის არის საჭირო ვებგვერდისა და, შესაბამისად, მისი კონტენტის seo ოპტიმიზაცია, რაც საძიებო სისტემის ოპტიმიზაციას ნიშნავს (seo – search engine optimisation). 

 

google ერთ-ერთი ყველაზე მეტად გამოყენებადი საძიებო სისტემაა. ძიებების 90% სწორედ google-ის მეშვეობით ხორციელდება. შესაბამისად, seo ოპტიმიზაციას აღნიშნული საძიებო სისტემის მაგალითზე განვიხილავთ. 

 

 

google-ში ძიების შედეგების ჩვენებისას, პირველ 2-3 შედეგს ხშირად რეკლამა წარმოადგენს, ხოლო  დანარჩენ სივრცეს სხვა, ყველაზე რელევანტურ ვებსაიტებს უთმობს. ამას ეწოდება ე.წ. ორგანული შედეგი (organic results). სტატისტიკის მიხედვით, ამ შედეგებიდან (გარდა რეკლამისა), ვიზიტორთა რაოდენობა პროცენტულად ასე ნაწილდება:

 

1-ლი ადგილი  – ვიზიტორთა 35-40%

მე-2 ადგილი – ვიზიტორთა 15-20%

 

მე-3 ადგილი – ვიზიტორთა 10%. 

 

შესაბამისად, ჩვენი ამოცანაა ვებსაიტი, სულ მცირე, ამ სამეულს შორის მოხვდეს. 

 

საძიებო სისტემები შედეგებს გარკვეული ალგორითმის მიხედვით გვიჩვენებენ.  საძიებო სისტემების მიხედვით (google, yahoo, yandex, bing), შესაძლოა, ეს ალგორითმი მცირედ განსხვავდებოდეს, თუმცა პრინციპი მაინც ერთია. 

ჩვენთვის მნიშვნელოვანია ვიცოდეთ, რომ არსებობს ორი ტიპის seo:  on – page seo და off-page seo.

on-page seo-ზე მუშაობისას უნდა გავმართოთ ის ელემენტები, რომლებიც უშუალოდ  საიტზე გვაქვს. მაგალითად: შინაარსი/კონტენტი, keyword-ები, სურათის აღწერები, თეგები, შიდა ლინკები, meta title, url და სხვ. ტექნიკური მახასიათებლები. შეიძლება ითქვას, on-page seo  სამართავად უფრო მარტივია, რადგან ვებსაიტს შენ აკონტროლებ, შესაბამისად, შეგიძლია, ნებისმიერ დროს შეიტანო სასურველი ცვლილებები. 

off-page seo კი მოიცავს ე.წ. backlink-ებს, ანუ რამდენად ლინკავენ შენს საიტს/კონტენტს ადამიანები თავიანთ ვებგვერდებზე, სოციალურ მედიაში, ფორუმებზე და ა.შ. off-page seo შედარებით ნაკლებად არის შენი კონტროლის ქვეშ,  რადგან ამ შემთხვევაში დამოკიდებული ხარ სხვა ადამიანების კეთილ ნებაზე, რამდენად ჩათვლიან ღირსად შენს კონტენტს, რომ გააზიარონ. ამ პრობლემას ღირებული და რელევანტური შინაარსის შეთავაზება მოხსნის. 

საძიებო სისტემები განუწყვეტლივ ვითარდებიან და უფრო მეტ ინფორმაციას ფილტრავენ, რათა უკეთესი შედეგები უჩვენონ მაძიებლებს. 

საძიებო სისტემებს შეუძლიათ განსაზღვრონ იმ ადამიანის ადგილმდებარეობა, რომელიც კონკრეტულ პროდუქტსა თუ სერვისს ინტერნეტის მეშვეობით ეძებს.  მაგალითად, თუკი  იმყოფებით თბილისში და google-ში ეძებთ ყვავილების მაღაზიას, ძიების შედეგად საძიებო სისტემა შემოგთავაზებთ თბილისში არსებულ ყვავილების მაღაზიებს, და არა, მაგალითად, ნიუ-იორკში არსებულს. 

საძიებო სისტემა, ასევე, განსაზღვრავს რომელ დივაისებს იყენებთ. დივაისების მეშვეობით საძიებო სისტემა უკვე ფლობს გარკვეულ ინფორმაციას თქვენზე და თქვენს ინტერესებზე, ეს კი  საშუალებას აძლევს, შემოგთავაზოთ ძიების გაცილებით რელევანტური შედეგები. 

seo-ზე მუშაობისას ერთერთი ყველაზე მნიშვნელოვანი საძიებო ფრაზების, ე.წ. keyword-ების სწორად განსაზღვრაა. keyword არის საკვანძო სიტყვა, რომელიც ზუსტად აღწერს ჩვენს პროდუქტსა თუ მომსახურებას. სწორედ ამ საკვანძო სიტყვების მეშვეობით ეძებენ მომხმარებლები ჩვენი ბიზნესის შესახებ ინფორმაციას. აუცილებელია, რომ აღნიშნული keyword-ები გამოვიყენოთ ჩვენი საიტის კონტენტში, სათაურებსა თუ აღწერებში. 

 

keyword-ების მოძიება შესაძლებელია ისეთი პლატფორმის მეშვეობით, როგორიცაა, მაგალითად, google keyword planner-ი. აქ შეგვიძლია ვნახოთ, რომელი სიტყვებითა თუ ფრაზებით ეძებენ ყველაზე ხშირად მომხმარებლები ჩვენი ტიპის პროდუქტსა თუ მომსახურებას. საძიებო სისტემის ოპტიმიზაციის დროს რელევანტური keyword-ის არჩევა არის თქვენი ვებსაიტის წარმატების საფუძველი.

 

უნდა დავრწმუნდეთ, რომ კონკრეტულ keyword-ზე თუკი გადმოვა მომხმარებელი, მას ადეკვატურ კონტენტს ვთავაზობთ, სხვა შემთხვევაში იგი უბრალოდ გავა ჩვენი საიტიდან.

გახსოვდეთ ოქროს წესი:  თქვენი საიტი დამზადებულია ადამიანებისთვის და არა –  საძიებო სისტემებისთვის. 

ნუ დაამატებთ ზედმეტ keyword-ებს ან მათ ვარიაციებს თქვენს საიტს. მათ გამოყენებას საჭიროების გარეშე ეწოდება “keyword stuffing”, რაც ეწინააღმდეგება საძიებო სისტემების პოლიტიკას.  

საკვანძო სიტყვების/ფრაზების არჩევისას უნდა გაითვალისწინოთ მათი გამოყენების:  სიხშირე, კონკურენტულობა და რელევანტურობა. ამ ყველაფრის გათვალისწინებით, წარმატებით შეძლებთ საიტის ოპტიმიზაციას. 

seo-ზე მუშაობა არასოდეს მთავრდება, ეს განახლებადი პროცესია. მომხმარებლებმა შესაძლოა შეიცვალონ ქცევა და, შესაბამისად, საძიებო სისტემებმაც შეცვალონ ალგორითმი. ჩვენი ამოცანაა განვსაზღვროთ, როგორ იმოქმედებს ცვლილებები ჩვენს საიტზე. 

რა უნდა გავაკეთოთ, რომ მუდმივად მოვხვდეთ საძიებო სისტემებში მოწინავე პოზიციებზე? 

 

  • შევისწავლოთ, როგორ მუშაობს საძებო სისტემა
  • ავუწყოთ ფეხი სიახლეებს.

მაგალითად, დღეს მნიშვნელოვანია, რომ საიტი იყოს მობილურზე მორგებული ( mobile-friendly), რადგან ყოველდღიურობაში უფრო და უფრო მეტი ადამიანი მოიხმარს სმარტფონს, ვიდრე კომპიუტერს.  

თვალი ვადევნოთ სხვა, კონკურენტი ბიზნესების საიტებს.

ხომ არ სთავაზობენ ისინი მომხმარებლებს  უფასო მიწოდების სერვისს? რამდენად აქტიურები არიან სოციალურ მედიაში? ხშირად ანახლებენ თუ არა ვებსაიტს ფოტომასალით? ეს დაგვეხმარება, დავხვეწოთ ვებსაიტი და გავხდეთ კონკურენტუნარიანები. 

ვესაუბროთ ჩვენს მომხმარებლებს. მივიღოთ მათგან რჩევები. მათ უკეთ იციან, რა გამოგვრჩა საიტზე; მათგან შეგვიძლია გავიგოთ, რომელ პროდუქტს ან მომსახურებას ეძებენ, რომელ საკვანძო სიტყვებს იყენებენ ძიებისას და სხვა

კონტრიბუტორი: ქეთევან ასლანიშვილი

Categories
სოციალური მედია ციფრული მარკეტინგი

რატომ არის საჭირო ვებ-გვერდი თქვენი ბიზნესის განვითარებისათვის?

ვებ გვერდი

რატომ არის საჭირო ვებ-გვერდი თქვენი ბიზნესის განვითარებისათვის?

დღევანდელ ციფრულ სამყაროში მსოფლიოს მოსახლეობის უდიდესი ნაწილისთვის ინტერნეტი ისეთ ფუნდამენტურ რესურსად იქცა, როგორიც საკვები და წყალია. ინტერნტენტზე მზარდ მოთხოვნას კარგად ასახავს რიცხვებიც: თუ საუკუნის დასაწყისში ინტერნეტს მხოლოდ 400 მილიონი ადამიანი იყენებდა, დღეს უკვე ამ რიცხვმა 4 მილიარდს გადააჭარბა.

ინტერნეტი ბიზნესის და განსაკუთრებით მარკეტინგის განუყრელ ნაწილადაც იქცა.  მისი მრავალი ფუნქციიდან ერთ-ერთი, ყველაზე სარგებლიანი და გამორჩეული სწორედ ონლაინ შოპინგია, რომელმაც ცხოვრება გაუმარტივა მომხმარებელსაც და კომპანიებსაც.

განსაკუთრებით დღევანდელი სიტუაციის პირობებში, როდესაც მთელი მსოფლიო კორონავირუსით გამოწვეულ პანდემიას ებრძვის, მოსახლეობას სახლში დარჩენა, კომპანიებს კი დისტანციურად მუშაობა უწევთ. ბიზნესის ონლაინ სივრცეში წარმოების და გავრცელების ერთ-ერთი ფუნდამენტური საკითხია ვებგვერდის შექმნა. მსოფლიოში დღესდღეობით 1.7 მილიარდზე მეტი ვებგვერდი ფუნქციონირებს და ეს რიცხვი დღითიდღე იზრდება. მიუხედავად ამისა, ხშირად ისმის კითხვა: რატომ არის საჭირო ვებგვერდი?

ბევრი ადამაინი ფიქრობს, რომ თუ აქვს ფიზიკური მაღაზია ან სოციალურ ქსელში გვერდი, საჭირო აღარ არის ვებგვერდის არსებობა. მაგრამ ეს მცდარი მოსაზრებაა, რადგან,  ვებგვერდი საშუალებას გვაძლევს  უფრო მეტ ადამიანს გავაგებინოთ ჩვენ შესახებ და შესაბამისად გავზარდოთ მომხმარებელთა რაოდენობაც.

როგორ მოვახერხებთ ამას?

– თანამედროვე სამყაროში, როგორც აღვნიშნეთ, უამრავი ადამიანი იყენებს ინტერნეტს, შესაბამისად, როდესაც რაიმე სჭირდებათ, ისინი ეძებენ საჭირო პროდუქტს ან მომსახურებას უმეტესწილად გუგლის საძიებო სისტემაში. აღსანიშნავია, რომ მხოლოდ ვებგვერდის შექმნა არ არის საკმარისი- თუ გვსურს, რომ მომხმარებელმა სწორედ ჩვენი კომპანია აირჩიოს, მნიშვნელოვანია ჩვენთვის საჭირო და რელევანტური keyword-ების შერჩევა, გამოყენება (ქივორდები არის ის სიტყვები, რომლების საუკეთესოდ აღწერენ კომპანიის კონტენტს, შინაარსს). მაგალითად, თუ თქვენ გაქვთ ყვავილების მაღაზია თბილისში, მომხმარებელი საძიებო სისტემაში წერს „ყვავილების მაღაზია თბილისში“ და თქვენი keyword-იც სწორედ ეს ან მსგავსია,  Seo-ს შემდგომ თქვენი ვებ- გვერდი იქნება პირველთა რიგებში, რომელსაც მომხმარებელი დაინახავს. სწორი keyword-ების მარტივად აღმოჩენაში დაგეხმარებათ google keyword planner, ასევე google trends, რომელიც შესაძლებლობას მოგცემთ შეადაროთ რამდენიმე სიტყვა და ნახოთ, რომელი უფრო ხშირად იძებნება.

 

მეორე მთავარი ფაქტორი, რისთვისაც საჭიროა ვებგვერდი, ეს არის რეპუტაცია.

ხშირად პოტენციური მომხმარებლები საძიებო სისტემაში ეძებენ რაიმე კომპანიას და როდესაც მას ვერ პოულობენ, აღიქვამენ არარეალურად და არ ენდობიან, საბოლოოდ კი მის არსებობასაც ივიწყებენ, შესაბამისად კომპანია კარგავს ახალ მომხმარებელს. ხშირია ისეთი შემთხვევებიც, როცა კომპანიას სოციალურ მედიაში აქვს გვერდი, მაგრამ არა საკუთარი ვებ-გვერდი. ამ დროს, როცა მომხმარებელი დაინტერესდება პროდუქტით ან მომსახურებით, დიდი შანსია, გაუჩნდეს მთლიანი ასორტიმენტის და ფასების დათვალიერების სურვილი და თუ ვერ აღმოაჩენს შესაბამის ვებგვერდს, ის დაიწყებს კონკურენტი კომპანიის მოძებნას, რომელსაც ორგანიზებულად, ვებ – გვერდზე ექნება ინფორმაცია განთავსებული, სადაც ყველაფერი იქნება თავმოყრილი და შეძლებს, სახლიდან გაუსვლელად დაათვალიეროს და აარჩიოს პროდუქტები. მნიშვნელოვანია ისიც, რომ თქვენი სოციალური ქსელის გვერდზე იყოს მიბმული ვებგვერდის ლინკი, რათა მარტივად შეძლონ მომხმარებლებმა მისი აღმოჩენა და მასზე გადასვლა.

 

მესამე და ალბათ ყველაზე მნიშვნელოვანი სარგებელი, რაც ვებ – გვერდის არსებობას მოაქვს, არის მომხმარებლის კეთილგანწყობა და მათი გულების მოგება, რაც ნამდვილად არაა მარტივი საქმე, ეს ხდება მაშინ, როდესაც  ვებ-გვერდი ყოველმხრივ მორგებულია მომხმარებელზე. ვებგვერდი არის კომპანიის ციფრული მაღაზია და იქ ისეთივე სასიამოვნო გარემო უნდა შევქმნათ, როგორსაც ფიზიკურ ფილიალში ისურვებდით. მაგალითად, როცა მომხმარებელი შედის კომპანიის ვებგვერდზე, ის არ უნდა აღმოჩნდეს ქაოსურ და უცხო გარემოში, არამედ პირიქით, მისთვის ნაცნობი, სასიამოვნო და მარტივი გარემო უნდა დახვდეს.

პირველი, რასაც ის დაინახავს უნდა იყოს სასიამოვნო დიზაინი (მაგალითად პასტელური ფერები) და არა გადატვირთული და მკვეთრი ფერები, რამდენიმე პროდუქტის აღმწერი ფოტო, ლოგო, რომელშიც უმჯობესია ჩაშენებული იყოს მთავარ გვერდზე დასაბრუნებელი შორთქათი, რაც თქვენს მომხმარებელს გაუადვილებს ვებ-საიტის დათვალიერებას. ასევე მთავარი მენიუ, სადაც კატეგორიებად იქნება ჩაშლილი პროდუქტის ასორტიმენტი, რათა უფრო მარტივი იყოს სასურველი პროდუქტის ძიება. 

აღსანიშნავია ისიც, რომ მომხმარებლის მოსაზიდად ერთ-ერთი აუცილებელი ფაქტორია, ვებგვერდი იყოს მობილურზე და სხვა გაჯეტებზე მორგებული ე.წ mobile -friendly, რადგანაც დღეს სმარტფონი ადამიანის საუკეთესო, განუყრელი მეგობარია, უფრო კომპაქტურია და უკვე იმ ყველა ფუნქციის შესრულება შეუძლია, რაც კომპიუტერს, მოსახლეობის უმეტესობა უფრო ხშირად  სწორედ სმარტფონით ეძებს  საჭირო პროდუქტს.

ამიტომაც საჭიროა, თქვენი ვებ – გვერდი იტვირთებოდეს მობილურის ეკრანზე ისე, როგორც კომპიუტერში. იმისთვის, რომ გაარკვიოთ, რამდენად მორგებულია თქვენი ვებგვერდი სხვადასხვა გაჯეტებზე, შეგიძლიათ გამოიყენოთ გუგლის ხელსაწყო – google mobile-friendly.

 

საბოლოო ჯამში, დღევანდელ რეალობაში რთული და, ფაქტობრივად, შეუძლებელია მსხვილი თუ მცირე ბიზნესის წარმოება ვებგვერდის გარეშე. მისი შექმნა ხდება პირველივე ეტაპებზე, რადგან დღეს პირდაპირ მაღაზიის საძებნელად ქუჩებში იშვიათად თუ დადიან, მომხმარებლები ჯერ ინტერნეტში ეძებენ სასურველ პროდუქტს, ირჩევენ მათთვის საუკეთესოს და მარტივად, სწორედ იმ მაღაზიაში მიდიან, ბევრი წვალების გარეშე.

ტექნოლოგიების განვითარების კვალდაკვალ დღეს უკვე იშვიათად იყენებენ ტრადიციულ მარკეტინგს და თითქმის მთელი მსოფლიო მომხმარებელთან კომუნიკაციისათვის ციფრულ მარკეტინგს ირჩევს, ვებგვერდი კი მისი განუყრელი ნაწილია, რომელიც კომპანიის მარტივ პორტფელს წარმოადგენს და სადაც მომხმარებლისათვის საჭირო ყველა ინფორმაცია ინახება. ასე რომ, თუ თქვენ ბიზნესს აწარმოებთ, მაგრამ ჯერ კიდევ არ გაქვთ ვებგვერდი, სჯობს იჩქაროთ. ვებგვერდის შექმნის პროცესს კი გაგიმარტივებთ და დაგეხმარებათ worldpress.com ან wix.com.

 

 

კონტრიბუტორი: თათია ჭიკაძე

Categories
სოციალური მედია ციფრული მარკეტინგი

როგორ იყენებს მარკეტინგი ნეირომეცნიერებას. ანუ რას ნიშნავს ნეირო მარკეტინგი ?

ნეირომარკეტინგი

როგორ იყენებს მარკეტინგი ნეირომეცნიერებას ანუ რას ნიშნავს ნეირო მარკეტინგი ?

ნებისმიერი მარკეტოლოგისთვის მნიშვნელოვანია იცოდეს, თუ რა სურს მომხმარებელს, შეაღწიოს მის ტვინში და გაიგოს, როგორ შექმნას მათთვის საუკეთესო ფასეულობა.

მარკეტინგი ხომ სწორედ მომხმარებლის საჭიროებების დადგენას და მათ დაკმაყოფილებას გულისხმობს, სწორედ ამიტომ, მარკეტინგის განვითარების ეტაპებზე ის უფრო დაუახლოვდა ფსიქოლოგიას და წარმოიშვა  ახალი დარგი – ნეირომარკეტინგი.

ნეირომარკეტინგის მიზანია, გაიგოს, როგორ მოახდინოს გავლენა მომხმარებლის გადაწყვეტილებაზე მათი ცენტრალური ნერვული სისტემის მუშაობის თავისებურებების გათვალისწინებით.  იგი ეხმარება კომპანიებს და მარკეტოლოგებს კონტენტის, ვებ-გვერდების, რეკლამებისა თუ პროდუქტის შეფუთვის იმგვარად აწყობაში, რომ მომხმარებელს უბიძგოს მათი პროდუქტის/მომსახურების შეძენისაკენ. სხვა სიტყვებით რომ ვთქვათ, ნეირომარკეტინგი ეხმარება ბიზნესს, განვითარდეს კონკურენტულ ბაზარზე, თანაც რაც შეიძლება ნაკლები დანახარჯებით.

საჭიროა მომხმარებლის ქვეცნობიერის შეცნობა და იმის დადგენა, თუ როგორ და რა გზებით არის შესაძლებელი აუდიტორიის ყურადღების მიქცევა და დარწმუნება, შეიძინონ პროდუქტი/მომსახურება.

ნეირომარკეტინგის წარმოშობის აუცილებლობა გამოიწვია ციფრული სამყაროს განვითარებამ და სარეკლამო საშუალებების კრიზისმა, ნეირომარკეტინგი უმეტესად უკავშირდება კვლევებს და ექსპერიმენტებს, რომელიც დღესდღეობით მრავალი ახალი ტექნოლოგიის საშუალებით ხორციელდება, როგორიცაა fMRA (functional Magnetic Resonance Imaging), მისი საშუალებით ხდება ადამიანის ტვინის სკანირება, შემდეგია ტვინის აქტივობის გამოვლენა, ​მომცემულ მომენტში. მაგალითად, როგორც ცნობილია, თავის ტვინის მარცხენა ჰემისფერო აკონტროლებს მარჯვენა მხედველობით ველს, ხოლო მარჯვენა ჰემისფერო ორივე მხედველობით ველს, კვლევებმა კი აჩვენა, რომ ამ შემთხვევაში გვაქვს საქმე გარკვეულ თავისებურებასთან, რომლის თანახმადაც ადამიანი პირველად ყურადღებას აქცევს მარცხენა მხედველობითი ველით აღქმულ ობიექტებს. ეს ინფორმაცია ნეირომარკეტინგში საკმაოდ პროდუქტიულად იქნა გამოყენებული, კერძოდ დადგინდა, რომ რეკლამირების დროს მთავარი აზრი, ლოზუნგი უმჯობესია მარცხენა მხარეს იყოს მოთავსებული, თუ გვსურს, რომ მომხმარებლებმა პირველ რიგში მას მიაქციონ ყურადღება. შესაბამისად, მარკეტერებმა, რომლებიც იცნობენ ნეირომარკეტინგის სფეროს, კარგად იციან თუ როგორ, სად და რომელი დიზაინით  გააკეთონ უფრო ეფექტური რეკლამები.

კიდევ ერთი საინტერესო ექსპერიმენტი, რომელიც ნეირომარკეტინგს უკავშირდება, იყო ფერებისა და შეფუთვის შერჩევა. ექსპერიმენტის შედეგით გამოიკვლიეს, რომ მომხმარებელს ნაკლებად იზიდავს პრიალა ქაღალდში შეფუთული პროდუქტი, მართლაც კომპანია Frito-Lay-მ თავისი შეფუთვის დიზაინი შეცვალა, მას შემდეგ, რაც ნეირომარკეტინგის გამოყენება დაიწყო. რაც შეეხება ფერებს, როგორც ცნობილია, სხვადასხვა ფერი განსხვავებულ ემოციებს აღძრავს, მაგალითად ლურჯი ნდობის ფერია, წითელი კი „აღმაფრთოვანებელი“. ფერებთან დაკავშირებით ნეირომარკეტინგი საუკეთესოდ გამოიყენა „კოკა-კოლამ“, მან თავისი ბრენდის ფერად აირჩია წითელი და დღემდე წითელი ფერი ყოველთვის ამ პროდუქტთან ასოცირდება.

როგორც აღმოჩნდა, ნეირომარკეტინგი თანამედროვე ციფრულ სამყაროში მართლაც უმნიშვნელოვანეს როლს თამაშობს ბიზნესის განვითარებაში, კერძოდ მისი ყველაზე გამორჩეული მხარე ისაა, რომ ხელს უწყობს გაყიდვების ზრდას, იგი აძლევს შესაძლებლობას კომპანიებს წინასწარ დაადგინონ ხალხის რეაქცია ახალ პროდუქტთან დაკავშირებით. მიუხედავად ამისა, ნეირომარკეტინგსაც გააჩნია გარკვეული უარყოფითი მხარეები, კერძოდ ბოლომდე არ არის გარკვეული მისი ეთიკური მხარე, რადგან ამ დროს ფაქტობრივად მარკეტერები და ფსიქოლოგები მომხმარებლის ტვინში „დაძვრებიან“ და იმ ინფორმაციას იღებენ, რაც შესაძლოა თვითონ მომხმარებელმაც არ იცოდეს. ასევე, არის საშიშროება, რომ ნეირომარკეტინგი გახდეს მანიპულაციის საშუალება, რაც არცერთი მომხმარებლისთვის არ იქნება სასიამოვნო.

ამრიგად, მიუხედავად გარკვეული ნაკლოვანებებისა ნეირომარკეტინგი თანამედროვე სამყაროს ერთ-ერთი საინტერესო აღმოჩენაა, რადგან ერთმანეთს დაუკავშირდა ორი ძალიან მნიშვნელოვანი სფერო: მარკეტინგი და ფსიქოლოგია, რაც მართლაც წინ გადადგმული ნაბიჯია ბიზნეს სექტორის განვითარებისათვის,  მეცნიერების აღმავლობის საუკუნეში.

კონტრიბუტორი: თათია ჭიკაძე

Categories
ციფრული მარკეტინგი

ინფლუნს მარკეტინგი და მისი უპირატესობები

ინფლუენს მარკეტინგი

ინფლუენს მარკეტინგი და მისი უპირატესობები

ინფლუენს მარკეტინგი პროდუქციის გაყიდვის პროცესში ინფლუენსერების ჩართვას გულისხმობს.

ვინ არიან ინფლუენსერები?

ინფლუენსერები არიან ადამიანები, რომლებსაც აქვთ ძალა და ავტორიტეტი, გავლენა იქონიონ სხვა ადამიანების გადწყვეტილებაზე კონკრეტული ნივთის შეძენისას. მათ მიერ სოციალურ ქსელში განთავსებული პოსტი, ისტორია, ან ვიდეო ხშირად უფრო ეფექტიანია გაყიდვების ზრდის თვალსაზრისით, ვიდრე ტრადიციული რეკლამა. ამიტომაც, თნამედროვე მარკეტერები თავიანთ სტრატეგიასა და ბიუჯეტში მნიშვნელოვან ადგილს ამ ტიპის მარკეტინგულ კამპანიებს უთმობენ. 

რატომ იქცა ინფლუენს მარკეტინგი გაყიდვების უმძლავრეს იარაღად? მილენიალების თაობა ფაქტობრივად ციფრულ სამყაროში ცხოვრობს, ისინი დროის უმეტეს ნაწილს სხვადასხვა სოციალურ ქსელში ატარებენ, ნივთებს ინტერნეტის მეშვეობით ეძებენ და ყიდულობენ. მათ გადაწყვეტილებაზე გავლენას ტრადიციული რეკლამა ვეღარ მოახდენს. გარდა ამისა, ინფლუენს მარკეტინგი კომპანიებს შესაძლებლობას აძლევს შედარებით მცირე დანახარჯებით გავიდნენ უფრო დიდ აუდიტორიაზე და მათი გზავნილიც უფრო ეფექტიანი იყოს. 

ინფლუენსერებს რამდენიმე ტიპად ყოფენ. ეს შესაძლოა იყოს მათი გამომწერების რაოდენობის  ან მათი სპეციალიზაციის მიხედვით. 

ინფლუენსერებს, შესაძლოა, ჰქონდეთ გარკვეული ნიშა. მაგალითად, მათი კონტენტი შეეხებოდეს მხოლოდ კულინარიას, მოდას ან სილამაზის სფეროს. არსებობენ ინფლუენსერები, რომლებიც პროფესიულ კონტენტს ქმნიან. მაგალითად, აქვთ ბლოგები მხოლოდ მარკეტინგზე, ჟურნალისტიკაზე და სხვა. მათი აუდიტორია არც ისე დიდია, თუმცა ვიწროდ სპეციალიზებული სამიზნე აუდიტორიაა, რაც კარგი შესაძლებლობაა იმ კომპანიისთვის, რომელსაც კონკრეტული სფეროთი დაინტერესებული ადამიანების მოზიდვა სურს. 

მიმდევრების რაოდენობის მიხედვით არსებობენ სელებრითები და მეგა ინფლუენსერები, რომელთა გამომწერების რიცხვი შესაძლოა მილიონსაც აღემატებოდეს.

სელებრითები არიან ადამიანები, რომლებმაც ონლაინის მიღმა მოიპოვეს პოპულარობა, არიან ცნობილი მომღერლები, მსახიობები თუ სხვ. 

მეგა ინფლუენსერები კი ცნობილები სოციალური ქსელის მეშვეობით გახდნენ. ერთ-ერთი ყველაზე ცნობილი და გავლენიანი ინფლუენსერი კაილი ჯენერია, რომელმაც პოპულარობა სწორედ ინსტაგრამის მეშვეობით მოიპოვა. მას სელებრითებს ვერ მივაკუთვნებთ, არც მომღერალია, არც მსახიობი და არც რაიმე სხვა დამსახურება აქვს. მართალია, კარდაშიანების ოჯახის წევრია და მონაწილეობას იღებდა მათ საოჯახო რეალითი შოუში, თუმცა, რეალურად, ცნობილი და გავლენიანი იგი ინსტაგრამმა გახადა. დღესდღეობით მას ინსტაგრამზე 176 მილიონი გამომწერი ჰყავს. სწორედ ინსტაგრამის მეშვეობით გახადა კაილიმ წარმატებული თავისი კოსმეტიკური ბრენდი ,,kylie cosmetics”  და 21 წლის ასაკში ისტორიაში ყველაზე ახალგაზრდა დამოუკიდებლად გამდიდრებული მილიარდერი გახდა. 

ცხადია, ყველა კაილი ჯენერის მასშტაბის ინფლუენსერი ვერ იქნება. არსებობენ მიკრო და ნანოიფლუენსერები, რომელთა გამომწერების რიცხვი 1000-დან 100 000-მდე მერყეობს.  შესაძლოა, საშუალო და მცირე ბიზნესების მარკეტინგულ კამპანიებში, მეგა ინფლუენსერებზე მეტად, მიკრო და ნანო იფლუენსერების ჩართვა უფრო ეფექტური იყოს.  ადამიანების უმეტესობისთვის სელებრითების მიერ გარეკლამებული პროდუქცია მიუწვდომლად გამოიყურება, ხოლო, თუკი კომპანიებს რეკლამას ნანო ინფლუენსერები გაუწევენ, ეს შექმნის განცდას, რომ კონკრეტული ნივთი თუ მომსახურება საშუალო სტატისტიკური ადამინისთვისაც ხელმისაწვდომია.

მარკეტინგული კამპანიის მსგავსად, ინფლუენსერ მარკეტინგული  კამპანიის დაგეგმვის დროსაც საჭიროა ჩამოვაყალიბოთ კონკრეტული მიზანი. უმეტესწილად, ეს არის ბრენდის ცნობადობის გაზრდა და გაყიდვების სტიმულირება.  მას შემდეგ, რაც გადავწყვეტთ, რომელ სოციალურ ქსელში გვსურს ჩვენი პროდუქციის განთავსება,  უნდა მოვიძიოთ, ვინ არის ყველაზე რელევანტური ინფლუენსერი, რომელსაც დავუკავშირებთ ჩვენი ბრენდის სახელს. რამდენად შეესაბამება და გამოხატავს იგი ჩვენი კომპანიის მახასიათებლებს. რა ტიპის აუდიტორია ჰყავს; შეესაბამება თუ არა ჩვენს სამიზნე აუდიტორიას;  მისაღებია თუ არა მისი საკომუნიკაციო ენა ჩვენთვის და სხვა. 

ინფლუენსერთან თანამშრომლობის კიდევ ერთი უპირატესობა არის ის, რომ იგი მონაწილეობას იღებს ჩვენი სარეკლამო კონტენტის შექმნაში ან მთლიანად თავად ქმნის მას, რაც კიდევ უფრო უმარტივებს საქმეს კომპანიას. ხშირად ინფლუენსერების შექმნილი კონტენტი უფრო კრეატიული და ეფექტიანია, რადგან მან უკეთ იცის, როგორ ესაუბროს საკუთარ აუდიტორიას. 

რა შეიძლება შესთავაზოთ ინფლუენსერებს თქვენი პროდუქციის რეკლამირების სანაცვლოდ გარდა ფულადი ანაზღაურებისა?   

1. ინფლუენსერები დაპატიჟეთ თქვენ მიერ მოწყობილ ღონისძიებებზე, კონფერენციებსა თუ წვეულებებზე. ეს კარგი საშუალებაა, იმისა რომ, პირველ რიგში, მათ გაგიცნონ, და, ასევე, თქვენი კომპანია გამოჩნდეს მათ სთორებსა თუ ფოტოებში, რომლებსაც თქვენს ღონისძიებაზე გადაიღებენ.

2. თუკი რაიმე პროდუქციას ყიდით, შეგიძლიათ, მათ საჩუქრად გაუგზავნოთ და სთხოვოთ, სოციალურ ქსელში შეაფასონ, რამდენდ მოეწონათ თქვენ მიერ გაგზავნილი საჩუქარი. დიდი ალბათობით, თქვენი კომპანია ამ ინფლუენსერის სთორებში მაინც მოხვდება. 

3. შესთავაზეთ წილი გაყიდვებიდან. თუკი მომხმარებელმა ინფლუენსერის მიერ გაზიარებული ლინკით შეიძინა თქვენი პროდუქტი, აქედან მიღებული შემოსავლიდან გარკვეული პროცენტი ინფლუენსერს ერგება.  

ინფლუენსერთან თანამშრომლობა, როგორც წესი, ერთჯერად აქტივობას გულისხობს. თუკი ინფლუენსერი თქვენი კომპანიის სტილს შეესებამება, გირჩევთ, ის თქვენი ბრენდის ამბასადორი გახადოთ, რაც გრძელვადიან თანამშრომლობას და თქვენი ბიზნესის წარმატებას ნიშნავს.  

ინფლუენსერ მარკეტინგი მომავალში კიდევ უფრო ეფექტური მიმართულება გახდება, რადგან სოციალური ქსელების მომხმარებელთა რიცხვი გეომეტრიული პროგრესიით იზრდება. მნიშვნელოვანია, რომ ფეხი ავუწყოთ ციფრული სამყაროს ტრენდებს და ყოველი ახალი პლატფორმა აღვიქვათ, როგორც იარაღი გაყიდვების სტიმულირებისთვის. 

კონტრიბუტორი: ქეთევან ასლანიშვილი

Categories
ციფრული მარკეტინგი

რა გავლენას ახდენს ბლოგები და ვლოგები ბიზნესზე?

ბლოგები და ვლოგები

რა გავლენას ახდენს ბლოგები და ვლოგები ბიზნესზე?

პირველ რიგში დავიწყოთ კითხვით – რა არის ბლოგი?

ბლოგი, ეს არის ონლაინ სტატია, ციფრული ჟურნალი, სადაც ერთი ან რამდენიმე ადამიანი აკეთებს რეგულარულ ჩანაწერებს გარკვეულ თემებზე. ბლოგების დამახასიათებელი თვისება ისაა, რომ ხშირად ჩანს ავტორის პოზიცია და დამოკიდებულება, რაც ერთგვარ მეგობრულ გარემოს ქმნის. სწორედ ამიტომ, პერსონალური ბლოგები ონლაინ დღიურებსაც  მოგაგონებთ. რაც შეეხება ვლოგებს, ისინი იგივე ბლოგებია, მაგრამ იმ განსხვავებით, რომ ისინი ვიდეო ვერსიებია, რაც ბოლო დროს ძალიან პოპულარულია, განსაკუთრებით კი Youtube პლატფორმაზე.

ციფრული ტექნოლოგიების ეპოქაში რთულია, მისი განვითარების თანმდევი ტენდენციებისგან თავის არიდება, ამიტომაც ბლოგები და ვლოგები უამრავი ადამიანის ცხოვრების განუყოფელ ნაწილად იქცნენ. დღესდღეობით უკვე მრავალი შინაარსის ბლოგი/ვლოგი არსებობს, თუმცა განსაკუთრებული პოპულარობით სარგებლობს ცნობილი ადამინების, მისაბაძი პიროვნებების, ასევე მომხმარებელთან დაკავშირებული კონტენტის მქონე ბლოგები, რაც უფრო ახლოსაა თემა მაყურებლის ან მკითხველის ყოველდღიურ ცხოვრებასთან, უფრო მეტად იზრდება ინტერესი და მოთხოვნა.  

რაც შეეხება კითხვას, თუ რა მნიშვნელობა აქვთ ბლოგებს და ვლოგებს ბიზნესისთვის, პასუხი არის ძალიან მარტივი – ისინი ძალიან დიდ გავლენას ახდენს კომპანიების ცნობადობაზე და მომხმარებლების დამოკიდებულებაზე. როგორ ხდება ეს? პირველ რიგში, ბლოგები ზემოქმედებს კომპანიის რეპუტაციაზე. მაგალითად, როდესაც ძალიან ცნობილი ვლოგერი, თავის ვიდეო რგოლში სვამს ან გემრიელად მიირთმევს რაიმე საკვებს, ან იყენებს რომელიმე ბრენდის მობილურს თუ ლეპტოპს, მომხმარებლის თვალში ის უფრო მეტ ფასეულობას იძენს, შესაბამისად, უმჯობესდება მომხმარებლის დამოკიდებულებაც. ასევე, არის მეორე უკიდურესობაც, როცა იგივე ვლოგერი უარყოფითად საუბრობს რომელიმე კომპანიის პროდუქტსა თუ მომსახურებაზე. იმის გამო, რომ ის ძალიან ცნობილია, ბევრი გამომწერი ჰყავს, ჩნდება გარკვეული უნდობლობის ფაქტორი მაყურებლის მხრიდან პროდუქტის მიმართ და დიდი შანსია, რომ ასეთმა კომპანიებმა პოტენციური მომხმარებლები დაკარგონ.

მეორე მნიშვნელოვანი სარგებელია ის, რომ კომპანია იძენს ახალ მომხმარებელს და ზრდის ცნობადობას. იმის გამო, რომ ბლოგებს ასეთი დიდი გამოხმაურება მოჰყვა, კომპანიებმა მასში ძალიან კარგი შესაძლებლობები დაინახეს, დაიწყეს ბლოგერებთან თანამშრომლობა და ისინი გახდნენ კომპანიების ერთგვარი ინფლუენსერები. კომპანიები აფინანსებენ მათ, იმ პირობით, რომ ისინი თავიანთ ბლოგში ან ვლოგში ახსენებენ მათ პროდუქტს ან/და მომსახურებას.  ის ადამიანები, რომლებიც უყურებენ ან  კითხულობენ ბლოგებს, მაგრამ არ იცნობენ სპონსორ კომპანიებს ექცევიან გარკვეული გავლენის ქვეშ. შესაძლოა თავიდან ვერ გააანალიზოს, რომ ბლოგი მის გადაწყვეტილებაზე იმოქმედებს, მაგრამ ინფორმაცია ქვეცნობიერში დაილექება და როცა არჩევანის წინაშე დადგება, ის სწორედ იმ კომპანიის პროდუქტს აირჩევს, რომელსაც ერთხელ სადღაც ყური, ან თვალი მოჰკრა. მიუხედავად ამ ყველაფრისა, პერსონალური ბლოგების გამოყენებას კომპანიის ცნობადობის გასაზრდელად აქვს უარყოფითი მხარეც, რადგან დღეს უკვე ყველამ იცის,  წარმატებულ ბლოგერებს ჰყავთ დამფინანსებელი კომპანიები. ამიტომაც მათი პროდუქტის პირდაპირ გარეკლამება, ხშირად იწვევს მომხმარებლის უარყოფით დამოკიდებულებას. ზოგჯერ კი იმდენად ხშირად ახსენებენ სპონსორ კომპანიებს, რომ ძალიან მოსაბეზრებელი ხდება, რის გამოც  კომპანიაც და ბლოგერებიც კარგავენ მომხმარებლებს. ამიტომაც ბლოგებში საჭირო პროდუქტის გარეკლამებისას მეტი სიფრთხილეა საჭირო.

აღსანიშნავია, რომ ბლოგები ავითარებს კომპანიის ურთიერთობებს მომხმარებელთან. ხშირად არის შემთხვევები, როდესაც  კომპანიები  თვითონვე ქმნიან საიტზე ბლოგებს და ვლოგებს სადაც თავიანთ პროდუქტს ან მომსახურებას განიხილავენ, იზიარებენ მომხმარებლის შეფასებას და ითვალისწინებენ რჩევებს, რითაც ზრდიან მომხმარებლის ჩართულობას. მაგალითად, ბევრმა საკვების მწარმოებელმა კომპანიამ შექმნა Youtube არხი, სადაც ნაჩვენებია სხვადასხვა ვარიანტი, როგორ შეგიძლიათ მათი პროდუქტის გამოყენება, რაც ზრდის პროდუქტის ცნობადობას და ეხმარებათ მომხმარებლის მოზიდვაში. ხშირად ასეთ ვიდეოებში იწვევენ ცნობილ და ხალხისთვის საყვარელ პიროვნებებს, რათა მათი გავლენით უფრო მეტი მომხმარებლები შეიძინონ.

ასე რომ, თუ 20 წლის წინ საერთოდ არ არსებობდა ბლოგები და ვლოგები, დღეს ისინი უკვე ითვლება მარკეტინგის ერთ-ერთ მნიშვნელოვან დამხმარე ინსტრუმენტად და შეიძლება ითქვას განუყოფელ ნაწილადაც კი. ამ სფეროში ჩამოყალიბდა კიდეც ერთგვარი ფრაზა „მომხმარებლის მიერ წარმოებული მარკეტინგი“, რაც სწორედ იმას ნიშნავს, რომ თანამედროვე სამყაროში მომხმარებლები მნიშვნელოვან ადგილს იკავებენ კომპანიებისა თუ ბრენდების განვითარებაში, როდესაც ისინი თავიანთ დამოკიდებულებას ბრენდების შესახებ ბლოგებით, ვიდეორგოლებითა და ვებ-გვერდებით აზიარებენ და ამით გავლენას ახდენენ სხვა მომხმარებელზე.

კონტრიბუტორი: თათია ჭიკაძე