Categories
ციფრული მარკეტინგი

მარკეტინგული შეცდომები, რომლებმაც გიგანტი კომპანიების არსებობაც კი საფრთხის ქვეშ დააყენა

მარკეტინგი და PR

მარკეტინგული შეცდომები, რომლებმაც გიგანტი კომპანიების არსებობაც კი საფრთხის ქვეშ დააყენა

მარკეტინგული შეცდომები, რომლებმაც გიგანტი კომპანიების არსებობაც კი საფრთხის ქვეშ დააყენა

ბევრი ადამიანისთვის მარკეტინგი, ერთი შეხედვით, მარტივ მიმათულებად მიიჩნევა, მაგრამ, რეალურად, ეს ასე არ არის. მარკეტინგი მოიცავს ბიზნესისა და კომპანიის თითქმის ყველა მნიშვნელოვან დეტალს: პროდუქტს, მომსახურებას, ფასს, ადგილმდებარეობას, ლოჯისტიკას და პრომოუშენს. ეს ყოველივე კი ერთიანდება მარკეტინგულ მიქსში.  ამიტომაც მარკეტოლოგებს საკმაოდ მაღალი პასუხისმგებლობა აკისრიათ და დიდი შრომის გაწევაც უწევთ.

მათთვის მნიშვნელოვანია, რომ საქმე მაქსიმალურად უშეცდომოდ აკეთონ, ინტენსიურად იკვლევენ ბაზრის იმისთვის, რომ ხშირად შეუმჩნეველი, თუმცა, შესაძლოა, უმნიშვნელოვანესი დეტალები ყურადღების მიღმა არ დარჩეთ. მიუხედავად ამისა, ბიზნესის წარმოების ისტორიის მანძილზე მარკეტინგული შეცდომის ბევრი მაგალითი არსებობს, რომლებმაც დიდი ზარალი მიაყენა უამრავ, მათ შორის მსოფლიოში ცნობილ კომპანიას, ზოგიერთისათვის კი საბედისწეროც აღმოჩნდა. ამ ბლოგში სწორედ მსგავს კამპანიებზე ვისაუბრებთ.

აღსანიშნავია, რომ ყველაზე ბევრი შეცდომა კულტურულად განსხვავებულ ქვეყნებში ვაჭრობის დროს ხდება. მართლაც, საერთაშორისო ვაჭრობას თან მრავალი პრობლემა ახლავს, მაგალითად ენობრივი ბარიერი, სხვადასხვა ერის ტრადიციები, შეხედულებები, განსხვავებული სამართლებრივი კანონები, ბიზნეს რეგულაციები და ა.შ.

კულტურული ჩვეულებების განსხვავებულობის გაუთვალისწინებლობის გამო ბევრ, საკმაოდ ცნობილ კომპანიას დაუშვია შეცდომა. მაგალითად, კოკა-კოლას, რომლის რეკლამაც რამდენიმე ფოტოსგან შედგებოდა და შემდეგ შინაარსს ატარებდა:

1.     ადამიანი ცხელ მზიან უდაბნოში ძალიან დაღლილია

2.     სვამს კოკა-კოლას

3.     ემატება ენერგია და მირბის.

აღნიშნული რეკლამა, ერთი შეხედვით, ჩვეულებრივია ჩვენთვის, მაგრამ არა არაბებისათვის. იმის გამო, რომ არაბული ტექსტები განსხვავებულად, მარჯვნიდან-მარცხნივ იკითხება, არაბულენოვანებმა რეკლამა სრულიად საპირისპირო მნიშვნელობით გაიგეს და რეკლამაც სრულიად წარუმატებელი აღმოჩნდა-მკვეთრად დაეცა აღნიშნული გამაგრილებელი სასმელის გაყიდვები.

ასევე, მნიშვნელოვანია მარკეტოლოგებმა გაითვალისწინონ სიტყვების განსხვავებული მნიშვნელობები სხვადასხვა ენაში. ამ ფაქტორის მიმართ უყურადღებობის ფონზე შეცდომა დაუშვა კომპანია შევროლეტმა, როცა გამოუშვა ახალი ავტომანქანა, სახელწოდებით შევროლეტ ნოვა (Chervolet Nova). სიტყვის Nova ესპანური მნიშვნელობაა „არ წახვიდე“. შესაბამისად მანქანა, რომელიც გადასაადგილებლად იყო საჭირო ესპანელებს ადგილზე დარჩენისკენ მოუწოდებდა.

როგორც აღინიშნა, მარკეტელოგებმა ყურადღება უნდა მიაქციონ თითოეულ, თუნდაც მცირე დეტალს, რათა უკეთ გაიაზრონ, თუ როგორ და რა სახით უნდა წარმოაჩინონ ის.

ტექნიკის მწარმებელმა კომპანია Sony-მ 2006 წელს ახალი პროდუქტის წარსადგენად არასწორი მიდგომა აირჩია, რის გამოც ბევრმა ადამიანმა კომპანიას რასიზმში დასდო ბრალი და პოტენციურ მყიდველებს ბრენდის მიმართ ნეგატიური დამოკიდებულება ჩამოუყალიბა. ბანერი რეალურად ასახავდა იმას, რომ უკვე შესაძლო იყო სონის PSP-ის თეთრ ფერში შეძენა, მაგრამ იმის გამო, რომ ბანერში თეთრკანიანის მხრიდან ფერადკანიანზე ერთგვარი ძალადობის, ჩაგვრის სცენა იყო გამოსახული, რაც რასიზმთან ასოცირდებოდა, კომპანიამ ეს კამპანია გააუქმა.

ასევე დიდი გამოხმაურება მოჰყვა ტანსაცმლის მწარმოებელი კომპანიის H&M-ის 2018 წლის საბავშვო კოლექციას, ისევ და ისევ ფერადკანიანთა შეურაცხყოფის თემის გარშემო. ამ შემთხვევაშიც კომპანია დაადანაშაულეს რასიზმში, რადგან მაისური წარწერით „Coolest Monkey in the Jungle” ეცვა შავკანიან მოდელ ბავშვს. ამ ფოტომ საკმაოდ უარყოფითი რეაქცია გამოიწვია სოციალურ ქსელში, შედეგად ბევრმა ონლაინ მაღაზიამ შეწყვიტა ამ მაისურების გაყიდვა, საბოლოოდ კი კომპანიამ პროდუქტი გაყიდვებიდან მოხსნა. რეალურად, არც ერთ კომპანიას არ ჰქონდა განზრახული გაეკეთებინა რასისტული განცხადება, თუმცა სწორედ მარკეტოლოგების უყურადღებობის გამო კომპანიამ საკმაოდ დიდი თანხა იზარალა და, ამავდროულად, მომხმარებლის ნეგატიური დამოკიდებულებაც მიიღო, რაც ნამდვილად არასასურველია ნებისმიერი ბრენდისთვის.

 

როგორც ვიცით, ახალი პროდუქტის წარმოებაც სწორედ მარკეტინგს უკავშირდება, შესაბამისად, მნიშვნელოვანია, ახალ პროდუქტთან დაკავშირებით თითოეული დეტალის გათვლა, რამდენად შეესაბამება კომპანიას სტრატეგიებსა და მიზნებს, არის თუ არა მოთხოვნადი და მისაღები მომხმარებელთა კონკრეტული ჯგუფისთვის და სხვა.

სიახლეები მომხმარებლისათვის, როგორც წესი, მისაღებია, თუმცა არის შემთხვევები, როცა ახალი პროდუქტის წარუმატებლობა მთლიანი კომპანიის წარუმატებლობას განაპირობებს. მიუხედავად ამისა, მსგავს შეცდომებს ახალ პროდუქტთან დაკავშირებით ისეთი დიდი კომპანიებიც უშვებენ როგორიცაა McDonald’s, ალბათ ბევრს გაგიკვირდებათ, მაგრამ თურმე ყველასთვის ნაცნობი რესტორანი ერთ დროს აწარმოებდა ჰოთდოგებს, სპაგეტის, ჰულა ბურგერს ანანასით, Arch Deluxe ბურგერს, რომელიც, კონცეფციის მიხედვით, ზრდასრულებისთვის იყო განკუთვნილი.

სამწუხაროდ, არც ერთმა ზემოთ ჩამოთვლილმა პროდუქტმა არ გაამართლა და კომპანიამაც იზარალა. პრობლემას კი ის წარმოადგენდა, რომ კომპანია კონცენტრირდა იმაზე, თუ როგორ გაიტანდა ახალ პროდუქტს ბაზარზე და გამორჩათ ყველაზე მნიშვნელოვანი: დაედგინათ, მართლა სჭირდებოდა თუ არა მომხმარებელს ახალი პროდუქცია.

საბოლოოდ,  ჩვენ დავინახეთ, რომ შეცდომებს ყველა უშვებს მათ შორის გიგანტი და გამოცდილი კომპანიებიც, მთავარია ისეთი შეცდომა არ დავუშვათ, რომელსაც კომპანიის ფინანსურ მხარეზე მკვეთრად ნეგატიური გავლენა ექნება, ან მეტიც, მისთვის საბედისწერო აღმოჩნდება. ამისათვის კი საუკეთესო გზაა, ვისწავლოთ სხვა, კომპანიების შეცდომებზე და ამ შეცდომათა მიზეზების შესწავლა ჩვენი წარმატებისთვის გამოვიყენოთ.

ამასთანავე, მნიშვნელოვანია, ახალი ნაბიჯების გადადგმისას გავითვალისწინოთ კომპანიის სტრატეგიები, კონცეფცია, სამიზნე კონტიგენტი, კულტურა და ა.შ. გადაწყვეტილება მიღებულ უნდა იქნას კომპანიის საერთო მიზეზებიდან გამომდინარე და კომპანია განხილულ უნდა იყოს, როგორც ერთი მთლიანობა.

ასევე, აუცილებელია გავითვალისწინოთ ისეთი გარე ფაქტორები, როგორიცაა მომხმარებლის და ზოგადად საზოგადოების  დამოკიდებულება და სურვილები. მნიშვნელოვანია, რომ თითოეული სიტყვა, თუ კადრი დიდი სიფრთხილით იყოს შერჩეული და რეკლამა სწორად იყოს გათვლილი თითოეული მომხმარებელზე, რათა მან შეასრულოს მისი მთავარი „მოვალეობა“-მოიპოვოს მომხმარებლის დადებითი განწყობა, გაზარდოს კომპანიის გაყიდვები და ხელი შეუწყოს მის მომავალ წარმატებას.

კონტრიბუტორი: თათია ჭიკაძე

Categories
ციფრული მარკეტინგი

Customer Service, როგორც ძლიერი მარკეტინგული სტრატეგია

მარკეტინგი და PR

Customer Service, როგორც ძლიერი მარკეტინგული სტრატეგია

რა არის მარკეტინგი? როგორ პოზიციონირდება მარკეტინგი კომპანიის საქმიანობაში?

მარკეტინგი თავის მხრივ მომსახურების მოთხოვნილების შესწავლას და მის მომხმარებლამდე სწორად მიტანას ემსახურება, ხოლო საბოლოო მიზანი ბაზარზე არსებული საქონლის ათვისება და გაყიდვაა. თანამედროვე მარკეტინგი მხოლოდ სოციოლოგიური კვლევებით და ვიწრო სტრატეგიის შექმნით აღარ შემოიფარგლება, იგი სხვა არამეზობელი დარგების შესწავლითაც ცდილობს დაახლოვოს კომპანია და მომხმარებელი ერთმანეთთან, ეს იქნება ნეირო მეცნიერების გზით, ინოვაციური ტექნოლოგიების შესწავლითა თუ ა.შ.

თანამედროვე მარკეტინგის განხორციელებისა და მისი სწორი სტრატეგიის შემუშავებაში დიდი თანხები იხარჯება, ასევე სოციოლოგიური კვლევები, გაყიდვების  სტიმულირება და ბაზრის შესწავლა საკმაოდ ძვირადღირებული მომსახურებაა. რა თქმა უნდა სწორ რეკლამირებასა და პრომოუშენში ჩადებული ინვესტიცია ერთ-ერთი მნიშვნელოვანი გარანტია ბიზნესის წარმატებულად მართვისთვის, თუმცა არაერთი დიდი კომპანიის ერთ-ერთ მნიშვნელოვან სტრატეგიას უშუალოდ მომხმარებელთან სწორი კომუნიკაცია წარმოადგენს.

Tesla-იყავი გულწრფელი და გამჭირვალე.

ტესლას გამოწვევებმა მომხმარებლებთან ურთიერთობის დარგში კომპანიას და ილონ მასკს უჩვენა სწორი გზა კომუნიკაციის წარმართვაში. უამრავი მომხმარებელი, რომლებმაც წინასწარი შეკვეთა გააკეთეს Model 3-ის შეძენაზე, უკმაყოფილებას გამოთქვამდა პროდუქტის მიღების ვადაგადაცილების გამო, ისინი Twitter-ის საშუალებით პოსტავდნენ პრეტენზიის შინაარსის შემცველ ტვიტებს. ამ პრობლემის დამალვის ნაცვლად, ილონ მასკი თითოეულ უკმაყოფილო მომხმარებელს უგზავნიდა პირად იმეილს, სადაც გულწრფელად განმარტავდა პრობლემას, რის გამოც არ შეეძლო მომხმარებელს შეკვეთის მიღება.პრაქტიკამ აჩვენა, რომ  ამ ტიპის უშუალო დამოკიდებულებამ და გამჭირვალობამ უკმაყოფილო მომხმარებლების მიმართ ისინი მაინც კომპანიის ერთგულ კლიენტებად დატოვა.

Adobe-რეაგირება მომხმარებლის პრობლემაზე, მანამ, სანამ ის მოხდება.

ზოგჯერ ჯობს იქამდე  აღიარო პრობლემა და გააგებინო მომხმარებელს, რომ  შენ უკვე მუშაობ  მის აღმოფხვრაზე მანამ, სანამ იგი კლიენტამდე მიაღწევს. ტექნიკის მყიდველმა იცის, რომ სისტემები ყოველთვის დროულად და ეფექტიანად არ მუშაობს, თუმცა, როცა კომპანია სამომავლო ხარვეზის შესახებ წინასწარ ამცნობს და ბოდიშს იხდის პრობლემის არსებობისთვის, მომხმარებლის კეთილგანწყობა მის მიმართ უფრო ინარჩუნებს თავის პოზიციას. Adobe care-ის ტვიტი ტექნიკური ხარვეზის არსებობის შესახებ, რომელსაც თან დართული ჰქონდა პატარა ლეკვის ვიდეო, მომხმარებლებში მხოლოდ დადებითი რეაქცია გამოიწვია.

 

 

 

 

 

 

Zappos-აღაფრთოვანე მყიდველი მომსახურებით.

Zappos არის ვებგვერდი,რომელიც დაარსდა 1999 წელს და მისი დაარსების დღიდან კომპანიის ერთ-ერთ უმნიშვნელოვანეს ღირებულებას მომხმარებელზე მორგებული მომსახურება წარმოადგენს. მათი სტრატეგიის მიხედვით სხვა დიდი კომპანიებისგან განსხვავებით მედია პლატფორმებში და სარეკლამო კომპანიებში ფული არ უნდა დაიხარჯოს და მათი მთელი რესურსი უნდა  დაეთმოს მომსახურების დახვეწას. მაგალითად, მათ ჰქონდათ უფასო მიტანის სერვისი, რომელსაც 4-5 დღე სჭირდებოდა დანიშნულების ადგილამდე მისვლაში თუმცა, Zappos-მა ამ სისტემის დახვეწაზე იმუშავა და ამანათის მიღება შეკვეთის განთავსებიდან მეორე დღეს ხდება. მნიშვნელოვანია, ის ფაქტი, რომ კლიენტებთან ურთიერთობის მაღალ ხარისხს წარმოადგენს უშუალოდ კომპანიის დამოკიდებულება თანამშრომლების მიმართ. მათი მთავარი მიზანია თითოეული დასაქმებული იყოს ენთუზიაზმით სავსე, რაც შემდეგ უკვე მომხმარებელთან ურთიერთობაში გამოიხატება. მაგალითად, თუ მყიდველს სურს Zappos-ის საიტიდან რაიმეს შეძენა და ისინი ამას არ აწარმოებენ მათმა წარმომადგენელმა კლიენტი უნდა გადაამისამართოს იქ, სადაც შეძლებენ პროდუქტის შეძენას.

 

 

ამრიგად costumer service შეგვიძლია მივიჩნიოთ მარკეტინგული სტრატეგიის ერთ-ერთ ძლიერ მხარედ, სადაც კომპანიისა და მომხმარებლის ურთიერთობა უფრო უშუალო და ღია დამოკიდებულებით შემოიფარგლება, ვიდრე ეს მანამდე იყო. 

კონტრიბუტორი: ნინი ბერიძე

Categories
ციფრული მარკეტინგი

მომხმარებელთან ურთიერთობა და პროდუქტის შეთავაზება

მარკეტინგი და PR

მომხმარებელთან ურთიერთობა და პროდუქტის შეთავაზება

როგორ დავადგინო, რატომ არ მაქვს გაყიდვები?

აი, გვერდით მაღაზიაში ბევრი ხალხი შედის, ჩემთან კი თითო-ოროლა!

ვუშვებ ამ რეკლამას და ეფექტი არ აქვს!

როგორ გავაფართოვო ჩემი ბიზნესი?

მოკლედ, მსგავსი შეკითხვები შორს წაგიყვანთ, თუ კარგად არ დაფიქრდებით, როგორ ემსახურებით მომხმარებელს და რას სთავაზობთ მას სინამდვილეში. ხშირად მცირე ბიზნესის მფლობელი იმდენად ჩართულია ყოველდღიურ რუტინაში, რომ ავიწყდება ცოტა ხნით კომპანიისთვის უცხო თვალით შეხედვა, დაკვირვება და ანალიზი იმისა, თუ რა კეთდება სწორად, რა შეცდომებია საქმიანობაში,  რას ფიქრობს მომხმარებელი პროდუქტზე და ზოგადად, იქნებ გაფართოვების დრო დადგა?

ძირითადი გამოწვევა, რომელსაც ბიზნესის წამოწყებისას შეხვდებით, მომხმარებელთან სწორი კომუნიკაციაა.  მომხმარებელთან სწორად აგებული ურთიერთობა კარგი გაყიდვების და თქვენი ბრენდის პოპულარობის წინაპირობაა. კმაყოფილი მომხმარებელი შემდგომში სხვებთანაც კარგ რეკომენდაციას გაგიწევთ  და აუცილებლად დაბრუნდება შემდეგი შენაძენისთვის.

გთავაზობთ რამდენიმე სტრატეგიას, რომელიც ჩემს შემთხვევაში კარგად მუშაობს და შეგიძლიათ, თქვენც გამოიყენოთ:

მოერგეთ მომხმარებელს

დაფიქრდით, როგორია სხვა კომპანიების თქვენთან, როგორც მომხმარებელთან, კომუნიკაცია – ხვდებიან კი ისინი, სინამდვილეში რა გჭირდებათ? იქნებ თქვენ ადგილზე მიტანის სერვისით სარგებლობა გსურთ, ისინი კი არ გთავაზობენ ამას, ან იქნებ ფეისბუქზე ეძებდით მომსახურებას/პროდუქტს და ვერ იპოვეთ?

მოკლედ, იმის თქმა მინდა, რომ ხშირად კომპანიები მხოლოდ საკუთარი მოსაზრებით ქმნიან მომსახურებას/პროდუქტს და ავიწყდებათ, როგორ შეიძლება მომხმარებელის ფაქტორის გათვალისწინება. დაფიქრდით, იქნებ მომხმარებელს უფრო გაუმარტივდება თქვენი მოძებნა, თუ Google -ის რუკაზე დაიტანთ თქვენს მაღაზიას, ან იქნებ Facebook-ზე სურს მას, რომ მოგწეროთ და გკითხოთ დეტალები მანამ, სანამ პროდუქტს შეიძენს?

გამოყავით დრო და აუცილებლად შეისწავლეთ, რა სახის კომუნიკაციას ელის თქვენი მომხმარებლის სეგმენტი თქვენგან და ითამაშეთ მათი წესებით. ამ შემთხვევაში, მერწმუნეთ, მეტად მოგებული დარჩებით.

გაეცით, რათა მოიპოვოთ

კარგ და ცუდ კომუნიკაციას შორის განსხვავება ისაა, რომ კარგი დამატებით ფასეულობას სძენს ორივე მხარეს, ჰმატებს რაღაცას, რაც ორივესთვის სასარგებლოა. ამიტომ, ყოველთვის, როდესაც მომხმარებელთან კომუნიკაციის გეგმებს აწყობთ, ეცადეთ, რაიმე სასარგებლო გააცნოთ მას. მაგალითად, თუ პატარა საკონდიტრო გაქვთ, მანამ, სანამ მყიდველი რაიმე ნამცხვარს შეარჩევს, გამოკითხეთ მას, რისთვის არჩევს ტკბილეულს, მოუყევით, როგორ ჩაის მოუხდება შერჩეული ტორტი, ან თუ დაბადების დღის ტორტს ყიდულობს, აჩუქეთ მისალოცი ბარათი და ა.შ

თქვენ, ასევე, შეგიძლიათ Facebook-ის გვერდზე, ტკბილეულის რეცეპტები დადოთ  და ასწავლოთ მომხმარებელს, როგორ შეიძლება სხვადასხვა ნუგბარის მომზადება. მოკლედ, ბევრი, რომ არ ვისაუბრო, მსგავსი დეტალების მოფიქრება თქვენც  შეგიძლიათ და ეს ნამდვილად დადებითან აისახება თქვენს საქმიანობაზე.

ეცადეთ, იყოთ მეგობარი

აბა, დაფიქრდით, მეგობრის რჩევით რამდენჯერ გაგისინჯავთ რაიმე პროდუქტი, ან მისულხართ ექიმთან კონსულტაციაზე?  დარწმუნებული ვარ, ბევრჯერ. ჩვენ, როგორც ადამიანებს, გვიყვარს მათი მოსმენა, ვისაც ვენდობით, ხოლო როგორც მომხმარებლებს – იმ კომპანიების პროდუქტების ყიდვა, რომელთან, ასევე, ვენდობით.

ამიტომ, ეცადეთ, იყოთ მეგობრული და სანდო. ყოველთვის ეცადეთ მყიდველის დახმარებას, მაშინაც კი, თუ მისთვის სასურველი პროდუქტი არ გაქვთ (არ დაგავიწყდეთ, შეგიძლიათ, სხვაგან გააგზავნოთ). პირველივე კომუნიკაციისას აუცილებლად მიესალმეთ, გაუღიმეთ, ნუ დაგავიწყდებათ – ეს დადებითი განწყობის და კმაყოფილების მნიშვნელოვანი ატრიბუტია. აუცილებლად უთხარით მომხმარებელს მადლობა თქვენი პროდუქტის არჩევისთვის და დაემშვიდობეთ.

ნუ დაგავიწყდებათ, რომ სხვა დროს თქვენც მომხმარებელი ხართ და კარგად იცით, როგორი მომსახურება გაგიხარდებოდათ. ამიტომ, ეცადეთ, ცოტათი მაინც დაემსგავსოთ იმას, რაც ყველაზე მეტად მოგწონთ. კარგად გახსოვდეთ, რომ ნებისმიერი მომხმარებელი, რომელიც თქვენი პროდუქტის დასათვალიერებლად მოვიდა, თქვენი პოტენციური მყიდველია. მომხმარებელთან კომუნიკაცია, მისთვის პროდუქტის შეთავაზება რთულია, თუმცა, თუ კარგად გესმით თქვენი პროდუქტის დადებითი მხარეები, მაშინ რატომაც არ შეიძლება ის სხვებსაც გააცნოთ, აღაფრთოვანოთ და დაიმეგობროთ ?!

კონტრიბუტორი: თამთა გველესიანი

Categories
ციფრული მარკეტინგი

მომხმარებელზე ორიენტირებული პროდუქტი და მომხმარებლის ტიპები

მარკეტინგი და PR

მომხმარებელზე ორიენტირებული პროდუქტი და მომხმარებლის ტიპები

ნებისმიერი ბიზნესი თანამედროვე სამყაროში მომხმარებელზე ორიენტირებული და მასზე მორგებული უნდა იყოს, წინააღმდეგ შემთხვევაში, ცოტა რთულია, შეინარჩუნოთ კონკურენტუნარიანობა და წარმატებულად დაიკავოთ თქვენი ადგილი ბაზარზე.

პირველ რიგში, აუცილებელია, რაიმე პროდუქტის შექმნამდე, კარგად დაფიქრდეთ, ვისთვის ქმნით პროდუქტს, როგორია თქვენი პოტენციური მომხმარებელი, რა სჭირდება, რა გაახარებს, როგორ იქცევა ყიდვისას და ა.შ. ეს დეტალები დაგეხმარებათ ისეთი პროდუქტის შექმნაში, რომლის საყიდლადაც მზად არიან ადამიანები.

კარგი იქნება, თუ იქამდე, სანამ ბიზნესზე მუშაობას დაიწყებთ, გაითვალისწინოთ მომხმარებლის სეგმენტაციის წესები და ამის მიხედვით შექმნათ მასთან კომუნიკაციის სტრატეგიაც.

აბა, დაფიქრდით და გაიხსენეთ პროდუქტი, რომელსაც ყველა იყენებს.

– პური, წყალი? – გაიხსენეთ, მაღაზიაში დახლზე რამდენი სახეობის პური დევს და არჩევანს როგორ აკეთებთ. განსხვავება ფასში, მოცულობაში, სახეობასა და ხარისხშია. ანუ, გამოდის, რომ პირველადი მოხმარების პროდუქტების მწარმოებლებიც კი მომხმარებლებს გარკვეულ ჯგუფებად ყოფენ და მათთვის შესაფერის პროდუქტებს სთავაზობენ.

მომხმარებლების ჯგუფებად დაყოფა სხვადასხვა ნიშნით ხდება, პირველ რიგში, ეს არის ე.წ დემოგრაფიული მახასიათებლები: ასაკი, სქესი, შემოსავალი, რის მიხედვითაც, კომპანიის შეთავაზებები განსხვავდება. ასევე, ვფიქრობთ გეოგრაფიულ სეგმენტაციაზე, რომელიც გულისხმობს მომხმარებლის დაყოფას მათი საცხოვრებელი ადგილის მიხედვით და  პროდუქტის შესაბამისად მორგებას. მაგალითად, თუ თქვენი სუპერმარკეტი აუზთან ახლოს არის, აუცილებლად გაითვალისწინეთ, რომ შესაძლოა, მომხმარებლებს ხშირად ავიწყდებოდეთ თმის სამაგრები, პირსახოცი და მსგავსი ნივთები, რაც აუზზე აუცილებელია.

ასევე, არანაკლებ საინტერესოა მომხმარებელის ფსიქოგრაფიული და ქცევითი მახასიათებლების მიხედვით დაყოფა. მომხმარებლის ქცევა ყიდვისას ხშირად იცვლება სხვადასხვა მიზეზის გამო, მაგალითად, საახალწლოდ ყველა ადამიანი საჩუქრების ყიდვასა და ახლობელი ადამიანების გახარებაზეა ორიენტირებული, ამისთვის ფულიც არ ენანებათ. ამიტომაა, საახალწლოდ კომპანიები მნიშვნელოვანი აქციებით, შეთავაზებებით რომ ანებივრებენ მყიდველებს. გარდა ამისა, დაიმახსოვრეთ, რომ მსგავს „ცხელ დღეებში“ მაღალი გაყიდვებისთვის წინასწარ მოამზადოთ თქვენი მარაგები და შეთავაზებები, რათა მაქსიმალურად შეძლოთ სასარგებლო პერიოდების კომპანიისთვის ეფექტურად გამოყენება.

რაც შეეხება ფსიქოგრაფიული მახასიათებლებით მომხმარებლების დაყოფას, ეს გულისხმობს მომხმარებლის ჰობის, საქმიანობის, ცხოვრების სტილის, სოციალური კლასის მიხედვით კლასიფიკაციას.

დაიმახსოვრეთ, რაც უფრო მეტი იცით მომხმარებელზე, მით უფრო მარტივად შეძლებთ მისთვის შესაბამისი პროდუქტის შექმნას. სწორედ ამიტომ, არ დაიზაროთ და აუცილებლად შექმენით თქვენი მომხმარებლის არქეტიპი, ანუ პიროვნება.

მომხმარებლის არქეტიპი გულისხმობს იდეალური მომხმარებლის აღწერას, რომელიც თქვენს პროდუქტს მოიხმარს. მაქსიმალურად დეტალურად აღწერეთ, რით არის ის დაკავებული, რას საქმიანობს, რა ჰობი აქვს, ან თქვენი პროდუქტის შეძენამდე რომელი კონკურენტის პროდუქტს მოიხმარდა და ა.შ. დაწერეთ მაქსიმალურად დეტალურად.

მაგალითად, თუკი ჰოსტელი გაქვთ ბორჯომში, სადაც მინიმალისტური სტილი, უფასო ყავა და კარავიც კი შეგიძლიათ შესთავაზოთ მომხმარებელს, შესაძლოა, მომხმარებლის ერთი ტიპი ასეთი იყოს:

ნიკა,  21 წლის;

სტუდენტი;

უყვარს მოგზაურობა;

ძირითადად, ავტოსტოპით მგზავრობს;

უსმენს გემოვნებიან მუსიკას;

Facebook-ზე აზიარებს ცნობილი ადამიანების გამონათქვამებს, უცნაურ მოვლენებს;

არის გაერთიანებული მოგზაურობის მოყვარულთა ჯგუფებში

უკრავს გიტარაზე;

ჰყავს ბევრი მეგობარი.

პროდუქტის ნიკაზე უფრო მეტად მოსარგებად, შეგიძლიათ, თქვენს შეთავაზებას დაამატოთ მეგობრებთან ერთად დასასვენებელი პაკეტი, მაგ: 10 კაცზე, რითაც შესაძლოა, მთელს თქვენს ჰოსტელს უთმობდეთ, დაბადების დღის, ან რაიმე დღესასწაულის აღსანიშნავად. მსგავსი მიდგომა შესაძლებლობას მოგცემთ, უკეთ გაყიდოთ თქვენი პროდუქტი, თუ სერვისი. ასე რომ, ხვალვე დაფიქრდით, რამდენად სწორ მომხმარებელზე გაქვთ ორიენტირი აღებული და არიან თუ არა თქვენი მყიდველები ის ადამიანები, რომელთა მოსაზიდადაც თქვენ რეკლამას, ან მსგავს აქტივობებს გეგმავთ?

კონტრიბუტორი: თამთა გველესიანი

Categories
ციფრული მარკეტინგი

რა არის კონტენტ მარკეტინგი და რატომ არის ეფექტური ბიზნესისათვის?

კონტენტ მარკეტინგი

რა არის კონტენტ მარკეტინგი და რატომ არის ეფექტური ბიზნესისათვის?

დღევანდელ ციფრულ სამყაროში რეკლამები ცხოვრების განუყრელ ნაწილად იქცა, რადგან ისინი ყოველ ფეხის ნაბიჯზე გვხვდებიან ონლაინ თუ ფიზიკურ სივრცეში. ფაქტობრივად, 21-ე საუკუნე რეკლამირების ხანად იქცა.

დღესდღეობით კომპანიების რეკლამირება საკმაოდ მაღალ დონეზეა განვითარებული, ამის ცალსახა მაგალითია კონტენტ მარკეტინგი, რაც  გულისხმობს მომხმარებლისათვის მოთხოვნადი, რელევანტური კონტენტის შექმნასა და გავრცელებას, ეს არის ერთგვარი მარკეტინგული ტექნოლოგია, რომლის მიზანიც მომხმარებლის მოზიდვაა.

კონტენტ მარკეტინგი, მთლიანად მომხმარებლებსა და მათ ფასეულობებზეა ორიენტირებული და სწორედ ეს ხდის მას ასეთ ეფექტურს, ის წარმოაჩენს ზუსტად იმას, რაც სამიზნე აუდიტორიას სურს და მოსწონს.

კონტენტ მარკეტინგი ზრდის ცნობადობას, ვიზიტორებს და, რაც მთავარია, მომხმარებელთა რაოდენობას. ბიზნესისათვის კონტენტ მარკეტინგი მეტად მომგებიანია, რადგან ტრადიციულ საშუალებებთან შედარებით მისი დანახარჯები 62% უფრო მცირეა და თანაც 3-ჯერ უფრო ეფექტური შედეგის მოტანა შეუძლია. მარკეტინგის ამ ტექნიკით კომპანიები ცდილობენ, უფრო დაუახლოვდნენ თავიანთ მომხმარებლებს, დაამყარონ მეგობრული ურთიერთობა და პოზიციონირდნენ, მათთვის მნიშვნელოვან, მათზე მზრუნველ ბრენდებად, ამიტომაც მარკეტოლოგები ცდილობენ, შექმნან არა  უბრალოდ რეკლამები, სადაც კომპანიაზე ისაუბრებენ, არამედ ისეთი კამპანიები, სადაც მომხმარებლებზე და მათ ფასეულობებზე გააკეთებენ აქცენტს.

მაგალითისთვის, ძალიან საინტერესო კამპანია ჰქონდა თავის მოვლის საშუალებების კომპანიას „DOVE“, რომლის მთავარი მიზანიც იყო, რომ თავისი მომხმარებელი ქალებისთვის დაენახებინა, რომ  იმაზე ლამაზები არიან, ვიდრე თვითონ ფიქრობენ. აქვე გთავაზობთ მოცემულ ვიდეოს:

კონტენტ მარკეტინგის დახმარებით, ასევე ძალიან კარგი კამპანია წამოიწყო ერთ-ერთმა მსხვილმა ავიაკომპანიამ „ჯეთბლუ“ (Jetblue). კამპანიის მთავარი გმირები ყველაზე პატრა მგზავრები – ბავშვები იყვნენ. იმის გამო, რომ ფრენისას ბავშვის ტირილი ბევრისთვის ძალიან დამღლელი და არასასიამოვნო იყო, კომპანიამ სცადა მგზავრებისთვის ეს მოვლენა სასიამოვნო გაეხადა, ამისათვის კი მათ გადაწყვიტეს, რომ  ბავშვების ტირილისას ყველა მგზავრისთვის მიეცათ 25% ფასდაკლება შემდგომ ფრენაზე. რა თქმა უნდა, შემოგთავაზებთ ვიდეოს ლინკსაც:

რა საკვირველია, კონტენტ მარკეტინგი მხოლოდ ვიდეო რეკლამებს არ მოიცავს და იგი ეხება პრომოუშენის ყველა საშუალებებსაც: ონლაინ რეკლამებს, სტატიებს, ფოტოებს, სხვადასხვა კამპანიებს, ინტერაქტიულ კვლევებს… მოცემულის ერთ-ერთი კარგი მაგალითია კოკა-კოლას კამპანია – „გაუზიარე კოკა-კოლა“, რომელიც ალბათ ბევრს ახსოვს.

როდესაც კომპანიამ დაიწყო ბოთლების ეტიკეტებზე ადამიანების სახელების დაწერა, რამაც მომხმარებლის აღტაცება გამოიწვია, ხალხი ყიდულობდა მას იმიტომ, რომ ბოთლზე ეწერა მათი სახელები და იქმნებოდა შთაბეჭდილება, რომ ეს ბოთლი პირადად მათთვის იყო შექმნილი. კოკა-კოლას ეს კამპანია მთელ მსოფლიოში ვირუსულად გავრცელდა და ბევრი ადამიანისათვის დარჩა სასიამოვნო მოგონებად.

საბოლოო ჯამში, კონტენტ მარკეტინგი არის  ერთ-ერთი ყველაზე ეფექტური პრომოუშენის საშუალება, რადგან, დღესდღეობით, მომხმარებლები ირჩევენ იმ ბრენდის პროდუქციას, რომელიც მათ სურვილებზე და ფასეულობებზეა ორიენტირებული.

კონტრიბუტორი: თათია ჭიკაძე